/Jamg’arma xizmatlari/Jamg’arma kafillik

Jamg’arma kafillik

Kafillik bu — qarz oluvchining tijorat banki oldidagi o‘z majburiyatlarini bajarishi uchun javob berish mas’uliyatini tadbirkorlik faoliyatini qo‘llab-quvvatlash davlat jamg‘armasiga (jamg‘arma) yuklaydigan kafillik shartnomasi.

Jamg‘arma tijorat banklarining kreditlari bo’yicha kredit summasining 50 foizigacha (50 foizi ham shu jumlaga kiradi) miqdorda, biroq 8 milliard so‘mdan ortiq bo‘lmagan miqdorda kafilliklar taqdim etadi.

Kafillik berilganligi uchun jamg‘armaga qarz oluvchi tomonidan milliy valyutada kafillik summasining bir foizi miqdorida bir martalik vositachilik haqini to‘laydi.

Kafillik quyidagi maqsadlardan tashqari barcha yo‘nalishlarga beriladi:

  • alkogol va tamaki mahsulotlari ishlab chiqarish;
  • savdo (bundan eksportoldi moliyalashtirish mustasno), umumiy ovqatlanish, avtomobillarga yonilg‘i quyish hamda elektr quvvatlantirish shoxobchalari faoliyatini tashkil etish va amalga oshirish;
  • ilgari olingan kredit va lizinglarni yoki istalgan boshqa qarzdorlikni qaytarish;
  • nobank kredit tashkilotlari va lizing kompaniyalarining resurs bazasini shakllantirish;
  • tavakkalchilikka asoslangan qimor va boshqa o‘yinlarni tashkil etish hamda shu maqsadlar uchun uskunalarni xarid qilish.

Jamg‘arma tomonidan kafillik faqat:

  • O’zbekiston Respublikasi hududida ro’yxatdan o’tgan va faoliyatini amalga oshirayotgan;
  • tugatilish bosqichida bo’lmagan;
  • ularga nisbatan bankrotlik tartiboti qo’zg’atilmagan;
  • murojaat sanasida kredit, lizing, soliq va majburiy yig‘imlar bo‘yicha muddati o‘tkazib yuborilgan qarzdorligi bo‘lmagan;
  • yomon kredit tarixiga ega bo‘lmagan (ushbu holat “Kredit-axborot tahlil markazi” Kredit byurosi ma’lumoti asosida aniqlanadi) qarz oluvchiga kafillik beriladi.

Jamg‘armaning berilgan kafilliklar bo‘yicha tijorat banki oldidagi majburiyatlari quyidagi holatlarda bekor bo‘ladi:

  • kredit bo‘yicha asosiy qarz kafillik summasi miqdorida to‘liq qaytarilganda;
  • Jamg‘arma tomonidan kafillik bo‘yicha to‘lovlar amalga oshirilganda;
  • Jamg‘armaning yozma ravishdagi ruxsatisiz kredit shartnomasi bo‘yicha majburiyatlardagi shaxslar o‘zgarganda;
  • Jamg‘arma tomonidan ijobiy xulosa berilgan buyurtmanomalar asosida tuzilgan kafillik shartnomalari bo‘yicha 3 oy muddatda kredit ajratilmaganda;
  • qarz oluvchi tomonidan kredit mablag‘lari buyurtmanoma va kredit shartnomasida belgilangan maqsadlarda ishlatilmaganda;
  • firibgarlik holatlari aniqlanishi, garov mulki noqonuniy ravishda begonalashtirilishi va boshqa jinoyat alomatlari aniqlanganda;
  • garov ta’minoti tarkibi Jamg‘arma roziligisiz o‘zgartirilganda;
  • Jamg‘armaning kafilliklar bo‘yicha majburiyatlari qonun hujjatlarida nazarda tutilgan boshqa holatlarda ham bekor qilinishi mumkin.

Kafillik olish uchun tijorat bankiga ariza bilan murojaat qilish yetarlidir. Tijorat banki kichik biznes va tadbirkorlik subyektlari arizasi asosida jamg‘armaga tadbirkor.statefund.uz informasion tizimi orqali elektron tarzda buyurtmanoma taqdim etadi, taqdim etilgan buyurtmanoma ko‘rib chiqiladi va o‘sha kunning o‘zida Jamg‘armaning tegishli javobi elektron tarzda tijorat bankiga etkaziladi.